പട്ടം

പട്ടം
--------------------------------------
പട്ടം കണക്കെയാണെന്റെ ബാല്യം
നൂലു കെട്ടി വലിച്ചിരുന്നെന്റെയച്ചൻ
ഞെട്ടറ്റ പൂ പോൽ കൊഴിഞ്ഞിടാതെ, വിണ്ണിൽ
തത്തിക്കളിച്ചോരെൻ പുണ്യകാലം
കാറ്റിന്റെ താളത്തിലാടി മെല്ലെ, സൂര്യ-
ഗോളത്തിലേക്ക് കുതിച്ചു ചെല്ലാൻ
അച്ഛന്റെ കൈവലിക്കൊപ്പമായ് പിന്നെയും
ആകാശതീരങ്ങൾ താണ്ടിടുമ്പോൾ
സത്വരം പട്ടമാം എന്റെ പ്രാണൻ വിട്ടു
സത്യലോകം തേടി എന്റെ താതൻ
കാറ്റും മഴക്കാറുമേറിടുമ്പോൾ , വാനിൽ
ദിക്കറിയാതെ പറന്നിടുമ്പോൾ
ഓർമ്മ തൻ നൂലിനാൽ പിന്നെയും ബന്ധിച്ചു
ഓരോ വഴിയും തെളിച്ചു താതൻ
ബന്ധനമല്ലിത്, ബന്ധങ്ങൾ തൻ നൂലു
പൊട്ടിച്ചിടാതെ പറന്നുയരാം.

ദീപക് ജി നായര്‍