തിര

തിര

കടലിൽ തുടിക്കുന്ന
തിരകളായ്ത്തീരണം,
കരയിലെൻ പ്രണയത്തി-
നലയായ് പതയ്ക്കണം,
വരളുന്ന നെഞ്ചിൽ
പടർന്നെന്റെ നോവതിന്‍,
മിഴിനീരിനുപ്പു നിന്‍
മുറിവില്‍ പടര്‍ത്തണം.

ആഴിതന്നാഴത്തില്‍
മുങ്ങിത്തിരഞ്ഞതില്‍ ,
ആഴ്ന്നൊരാ ചേതന-
യ്ക്കന്നം കൊടുക്കണം.
മറവിയാംപൂഴിമണ്ണ-
ടിയില്‍ നിന്നോര്‍മ്മകള്‍,
മറനീക്കിയായിരം
ശംഖുമായ് തെളിയണം.

നിറനിലാവില്‍ മനം
മധുരമായ് പാടവേ,
അലസമാം ലാസ്യമോ-
ടലിയുവാനാകണം.
കാമാഗ്നിയാല്‍ നാഗ
യക്ഷിയായ് ഇഴയണം,
ഉയിരതിന്നുറവുകള്‍
നക്കിത്തുടയ്ക്കണം.

മണ്ണിലെ പാപത്തി
ലുറയുന്ന കറകളെ,
ചെന്നിണം പൂക്കുന്ന
രാജാങ്കണങ്ങളെ,
ശാപം വിതയ്ക്കുന്ന
മൂകാശ്രമങ്ങളില്‍
കേഴുന്ന വിശ്വാസ
നരനാരിരൂപികള്‍
കണ്ണില്‍ തിളയ്ക്കുന്ന
കാമാര്‍ത്തിയാല്‍,
താത ചിന്തമറക്കും
നരാധമ ഭോഗികള്‍
തിരനീട്ടിയെല്ലാമൊടുക്കണം,
നന്മതന്‍, തിരിനീട്ടി ദീപം
തെളിക്കുവാന്‍ ഭാവിയില്‍.

ദീപക് ജി നായര്‍

സനാഥന്‍

സനാഥന്‍ 

മുറ്റത്തെ നെല്ലിമരത്തില്‍ നിറയെ
അച്ഛന്‍ പറയാതെ പോയ വാക്കുകള്‍....
താഴെ അമ്മ വിരിച്ച തണല്‍പ്പായ ...

വേനല്‍ച്ചൂടില്‍ സനാഥത്വത്തിന്റെ
സാന്ത്വനമായി ഒരു ഒറ്റമരക്കാട്..

ദീപക് ജി നായര്‍

ഒരു ദശാബ്ദത്തിന്റെ ഓര്‍മ്മകളെ
കരിയിലക്കൂട്ടത്തിനടിയില്‍ മറവുചെയ്യാന്‍ ശ്രമിക്കുന്നു ചിലര്‍...

നഷ്ടപ്പെട്ട പ്രതാപകാലത്തെ
കരിയിലക്കൂട്ടങ്ങള്‍ക്കിടയില്‍ ചിക്കിച്ചികയുന്ന മറ്റുചിലര്‍...

കരിയിലകള്‍ വാരിയിട്ട് കത്തിച്ച അടുപ്പില്‍, തിളയ്ക്കുന്ന വയറിലേക്ക് അരിമണികള്‍ വീഴുന്നതും കാത്ത്
വായപിളര്‍ന്നേ ഇരിക്കുന്നൂ, വഴിയരികില്‍ ഒരു പാവം കഞ്ഞിക്കലം...

ദീപക് ജി നായര്‍

വായിച്ചുപോകുന്ന വരികളില്‍ നിന്നും തെന്നിമാറി തിരുത്തുവാനാകാത്ത
കഥാന്ത്യത്തിലേക്ക് എത്തിനോക്കുവാന്‍ വെമ്പുന്നു, മനസ്സ്...

എന്തിനോ നേര്‍ന്ന വഴിപാടുപോലെ ഒരു വായന... ജീവിതവും!

ദീപക് ജി നായര്‍

ചെയ്ത പാപങ്ങളുടെ ഓര്‍മ്മകളെല്ലാം പെറുക്കിക്കൂട്ടി കണ്ണുതുറന്നൊന്നു് നോക്കുവാന്‍ പോലുമാകാതെ മനസ്സുകൊണ്ട് ഒരു യാത്രയ്ക്കൊരുങ്ങുകയാണോ നീ?
കുറ്റബോധത്തിന്റെ മൗനം ചുണ്ടുകളില്‍ പതിപ്പിച്ച്, ഉള്ളിലെ സ്വയം ഉരുക്കലിന്റെയുപ്പുകള്‍ കവിളിലൂടെ അരിച്ചിറങ്ങുമ്പോള്‍, പശ്ചാത്താപത്തിന്റെ അഗ്നിശുദ്ധിയാല്‍ നീ പാപമുക്തനാക്കപ്പെട്ടിരിക്കുന്നു...
തിരികെ വരിക...
പാപങ്ങളുടെ ഈ പറുദീസ നിനക്കായ് ഉറക്കമിളച്ച് കാത്തിരിക്കുന്നു...
പാപങ്ങളുടെ ശയ്യയും പാപമോക്ഷക്കിണറുമുള്ളത് ഈ മണ്ണില്‍ തന്നെ..
പാപവും പാപനാശനവും ചെയ്ത് നീ ഇവിടെത്തന്നെ തുടരുക..


ദീപക് ജി നായര്‍

കാലപ്പകര്‍ച്ച

കാലപ്പകര്‍ച്ച 

മിഴികളില്‍ ഗ്രീഷ്മം
മൊഴികളില്‍ ഹേമന്ദം,
മനസ്സില്‍ ഇലപൊഴിച്ചു കൊണ്ടൊരു ശിശിരവും,
അകപ്പെയ്ത്തിലൂടെ വര്‍ഷവും ഇടകലരുന്നു....
കാലങ്ങളുടെ ഇണചേരലുകളില്‍
ഇനിയും വിടരുവാനാകാതെ വസന്തം

ദീപക് ജി നായര്‍..

മനസ്സിലൊരു ദീപപ്രകാശമായ് നിത്യവും 

മലരിതളിൽ മേവുമെന്നംബേ തെളിയണേ!! 

മനമുരുകി നിൻ നടയിലണയുമീദാസന്റെ 

മതിയിലിരുൾമറ നീക്കി വാണീ തുണയ്ക്കണേ !!

ദീപക് ജി നായർ