Gopaalam - Its for you my Dad........

പാതി നിർത്തി മടങ്ങുവാനല്ല ഞാൻ

പാരിൽ വന്നു പിറന്നതു നിശ്ചയം

പോരടിച്ചെൻ പരീക്ഷണശാലയിൽ

നേരുതേടുന്നിതോരോ ദിനത്തിലും.

പട്ടുമെത്തയിലൊട്ടിക്കിടക്കിലും

ചുട്ടു പൊള്ളും വെയിൽത്തീ കുടിക്കിലും

പാഠപുസ്തകത്താളിന്നുമപ്പുറം

പാഠമെത്ര പകർന്നതാം പാതകൾ

പാടെ മായും പകൽ വെളിച്ചം, നിലാ-

പ്പാലൊഴുക്കുന്ന പാതിരാപ്പൊയ്കകൾ

കെട്ടിയൊട്ടിച്ച ബന്ധങ്ങൾ,ബന്ധന-

ക്കെട്ടു പൊട്ടിച്ചു പായും 'പരാശ്രിതർ'

തട്ടിമാറ്റുവാനാകാതിരുൾക്കൂടില-

റ്റു വീണുപോം മൊട്ടുകൾ, മൂകമാ-

യൂർദ്ധശ്വാസം വലിക്കും വരാന്തകൾ.

കാലിൽ വന്നുമ്മ തന്നു കിടാങ്ങളെ

കാലനൂരേറ്റുമുഗ്രസർപ്പങ്ങളും

കാതുപൊത്തിപ്പിടിച്ചവർ, കൺകളിൽ

കരുണവറ്റിക്കരിഞ്ഞവർ, പിന്നെയും

കാട്ടുപൂവിനോടിഷ്ടം നടിച്ചവർ.

കൂട്ടുവെട്ടിപ്പിരിഞ്ഞവരങ്ങിനെ

 പട്ടടയ്ക്കുള്ളിലെത്തുന്നിടം വരെ

തൊട്ടറിഞ്ഞീടുമെത്രസത്യങ്ങൾ നാം.

ദീപക് ജി നായർ