Gopaalam - Its for you my Dad........

തരിക മലയാളമേ പഴയതെൻ നാടിന്റെ

തരി, കലർപ്പില്ലാത്ത താരകപ്പൂമുഖം

ഇരതേടുമായിരം നരിമിഴികളിരുളിലായ്

കുരുതിക്കളങ്ങളാകുന്നെന്റെ കേരളം

ചിരി വഴുതി വീഴുന്നു ചിന്തകൾക്കപ്പുറം

ചിറകറ്റു വീഴുന്നു, ചിരകാല കനവുകൾ

വർണ്ണങ്ങൾ ചാലിച്ച സ്വർഗ്ഗസ്വപ്നങ്ങളിൽ

കർമ്മം മറന്നാർത്തി പൂണ്ടുനില്ക്കുന്നവർ

ധർമ്മമെല്ലാം വെടിഞ്ഞമ്മമലയാളത്തി-

ലങ്കം കുറിക്കുവാൻ , കച്ചകെട്ടുന്നവർ

കാലമേ നീ തന്ന പാഠങ്ങളത്രയും

കാടത്തമേറ്റിക്കുലം മുടിക്കുന്നുവോ?

തരിക മലയാളമേ പഴയതെൻ നാടിന്റെ

തരി, കലർപ്പില്ലാത്ത താരകപ്പൂമുഖം.

ദീപക് ജി നായർ