Posts
മുഖം നഷ്ടമായവര്
------------------------------------------
ഇനിയുമൂറ്റിക്കൊടുക്കുക നിന് നിണ
മന്ത്യശ്വാസം വരേയ്ക്കും നിലയ്ക്കാതെ
ചുളിവാര്ന്ന നിന് ദേഹമറിയാതെ, യൗവനം
അകലുന്ന വഴിയിലും അണപൊട്ടിയൊഴുകുന്ന,
അതിഥികള്ക്കവസാന അത്താഴമേകുക.
ദാഹിച്ചലഞ്ഞു വരുന്നൊരീ യാത്രികര്ക്കാ
ലംബമായ് സത്ര നടയില് നീ കാക്കുക
പൂമരച്ഛായയില് പൂത്തു നീ നില്ക്കുക
പുഞ്ചിരിപ്പാല്മധുരമിറ്റിച്ചിരുത്തുക
വേവുന്ന ചൂടിലൊരു വിശറിപോല് വീശി നിന്
നാവിലാ പാപത്തിന് ഉപ്പു രുചിക്കുക
കണ്ണുകളടച്ചു നിന് കാഴ്ച മറയ്ക്കുക
കരളില് നിന് കനവുകള് ഊതിക്കെടുത്തുക
അറിയുക വഴിപോക്കനിവനെന്നു സ്പഷടമായ്
അകതാരില് നീ ശിലയലിയാതെ കാക്കുക
മുഖപടം മാറാതെ ചേര്ത്തു പിടിക്കുക
മിഴികളില് നനവിന്റെ ഉറവ് വറ്റിക്കുക
മൊഴികളില് നോവുകള് പൊഴിയാതെ നോക്കുക
ഒടുവില് നിന് നെഞ്ചിന് മിടിപ്പുകള് ബാക്കിവച്ച -
കലുന്ന നിഴലുകള്ക്കെണ്ണം കുറിക്കുക
മഴപെയ്തു തോര്ന്നൊരീ മണ്ണില് നിറച്ചാര്ത്ത്
വീണ്ടും നിറച്ചു നീ നടയില് നിന്നീടുക
അപ്പൊഴും പെയ്യും മനസ്സാം മരങ്ങള് തന്
തേങ്ങും മഴത്തുള്ളി ചിരിയാല് മറയ്ക്കുക
ദീപക് ജി നായര്
No comments:
Post a Comment