ഇന്നലെകള്‍

ഇന്നലെകള്‍
---------------------------
ഇന്നലെ ഞാന്‍ കൊണ്ട വെയിലൊന്നു കായുവാന്‍
ഇന്നുമീ  മുറ്റത്തിറങ്ങി നിന്നു
ഇന്നലെക്കണ്ട തിളക്കമുണ്ടെങ്കിലും
ഇന്നതില്‍ ഈര്‍പ്പമലിഞ്ഞിരുന്നു
ഇന്നലെ മുങ്ങിക്കുളിച്ചൊരാ പുഴതന്നില്‍
ഇന്നും കുളിര്‍ തേടിയെത്തി മെല്ലെ
ഇന്നലെകളെല്ലാം ഒഴുക്കി കളഞ്ഞവള്‍
ഇന്നിന്റെയാകാന്‍ കൊതിച്ചു നിന്നൂ
ഇന്നലെക്കണ്ടു ചിരിച്ചോരാ പൂമുഖം
ഇന്നും നുകര്‍ന്നിടാനെത്തി രാവില്‍
ഇന്നലെ പൂത്തു വിടര്‍ന്നൊരാ പൂവുകള്‍
ഇന്നു കരിഞ്ഞു കൊഴിഞ്ഞിരുന്നു
ഇന്നലെ പൈങ്കിളി പാടിയ പാട്ടുകള്‍
ഇന്നു ഞാന്‍ കേള്‍ക്കാന്‍ കൊതിച്ചിരുന്നു
ഇമകളില്‍ ഈറനണിഞ്ഞു കൊണ്ടിന്നവള്‍
ഇളയുടെ മടിയില്‍ കിടന്നിരുന്നു..
ഇന്നലെകളെല്ലാം കൊഴിഞ്ഞു വീഴുമ്പോഴും
ഇന്നില്‍ ഞാനതിനായ് തിരഞ്ഞിരുന്നു

ദീപക് ജി നായര്‍