Gopaalam - Its for you my Dad........

മരമൊന്നു നട്ടു ഞാൻ മണ്ണിലല്ല, മനം
മരവിച്ചിടാ മുഖപ്പുസ്തകത്തിൽ
തടമൊന്നെടുത്തതിൻ ചോട്ടിലല്ല, ജനം
നിറയുന്ന കവലയിൽ കാഴ്ചയാക്കി
വളരുന്നതിലയല്ല,  കാണ്ഡമല്ല, വനം
കരിയുന്നൊരഗ്നി തൻ നാവതല്ലോ
പൂത്തതും കായ്ച്ചതും കനികളല്ല, ധനം
പൂത്തിരിക്കും പണപ്പെട്ടി മാത്രം
പെയ്യാതൊഴിഞ്ഞ പേമാരിയല്ല, കനൽ
പെയ്യുന്നൊരീക്കൊടും വേനൽ മാത്രം.
തണ്ണീരു വററിയതല്ല തെല്ലും, തണൽ
തല്ലിക്കെടുത്തി മഴ ചുട്ടു തിന്നോൻ,
മരമൊന്നു നട്ടു നനച്ചെടുക്കാം, മണ്ണിൽ
വരമൊന്നിതെന്നു കുറിച്ചു വയ്ക്കാം.

ദീപക് ജി നായർ