ഇടവപ്പാതി

ഇടവപ്പാതി
------------------
ഇടവമാസത്തിലെ കുളിരുന്ന  മഴയിലെൻ
ഇറയത്തിരുന്നു ഞാൻ കണ്ടു
ഇലകൾ തൻ കവിളിണയിലിറ്റിറ്റു വീഴുന്ന
ചെറുമണി
ത്തുള്ളിക്കു നാണം
വിടരാതെ നിന്ന പൂമൊട്ടിന്നു ചുംബന
ക്കുളിരേകിയുതിരും കണങ്ങൾ
കവിയുന്ന പുഴതന്റെ ഓളങ്ങളിൽ കൊച്ചു
കവിതയായ് ഉലയുന്ന തോണി
മുടിയിൽ നിന്നൂറുന്ന തേൻമാരി തൻ മുത്ത്‌
മടിയിലേക്കിറ്റിച്ചു വീഴ്ത്തി

ഉടയാത്തൊരുടലോടെ മണിമുത്തു പൊഴിയുന്ന 

വടിവിൽ  നിറഞ്ഞു  നീ നില്ക്കെ
ഇനിയേതു സ്വർഗ്ഗം തിരഞ്ഞു നാം പോകണം
ഇവിടമല്ലാതേതു സ്വർഗ്ഗം ...

ദീപക് ജി നായര്‍