അഗ്നിസാക്ഷിയായ് വരിച്ചവനെ
അഗ്നിയിലേക്കെടുക്കുന്നു.
നെറ്റിയിലെ സൂര്യന്‍
ഉപ്പുകടലിലൊലിച്ചു പോകുന്നു.
ചിതയില്‍ നിന്നൊരു കൊള്ളി
നെഞ്ചിലേക്കെടുക്കുന്നു
ചിതറിയ സ്വപ്നങ്ങളെ
വിളക്കിച്ചേര്‍ക്കുന്നു..
ഇന്നലെകളെയെല്ലാം ആവാഹിച്ച്
മറവിയില്‍ ബന്ധിക്കുന്നു
നാളെയാം പട്ടം സ്വപ്ന
നൂലതില്‍ കൊരുക്കുന്നു..
നാടകമിതില്‍ വേഷഭാഷകള്‍ പുതുക്കുന്നു
കരിഞ്ഞ കൊമ്പില്‍ പൂക്കള്‍,
പിന്നെയും ചിരിക്കുന്നു
കൊഴിഞ്ഞ പൂവില്‍ മധു 
മധുരം നിറയ്ക്കുന്നു
ദീപക് ജി നായര്‍

അസ്തമിക്കാന്‍ സമയമായില്ലെന്ന്
ഉച്ചസൂര്യന്‍, തിളയ്ക്കുന്നു പിന്നെയും
അന്തിമേഘച്ചുവപ്പാറിവിണ്ണിതില്‍
ചന്തിരന്നെഴുന്നെള്ളാന്‍ തിടുക്കമായ്
പുല്ലുതിന്നുമദിച്ചാര്‍പ്പുമായ് ദിനം
തള്ളിനീക്കുന്നിരുകാലികള്‍ ജനം
വാനിലമ്പിളി പൂത്തു നിന്നീടിലും
സൂര്യശോഭ നിറഞ്ഞു നിന്നീടിലും
കാര്യമെന്തെനിക്കെന്നു പഴിച്ചിഹ-
ലോകവാസം കഴിക്കുന്നു സര്‍വ്വരും.

ദീപക് ജി നായര്‍

:) വാക്കുകള്‍ കൈവിട്ടു പോകുന്ന നേരത്ത്
നോക്കിലൂടെന്നെ തിരുത്തുന്ന ശക്തിയി-
ന്നാകാശമേടയിലായിരം താരത്തി‍ലൊ-
ന്നായ് ചിരിച്ചേ തിരുത്തുന്നതിപ്പൊഴും.. :(

ദീപക് ജി നായര്‍

നേരം വെളുക്കുവാൻ നേരമായില്ലിത്ര
നേരത്തെയെന്തിന്നെഴുന്നേല്ക്കണം
സ്കൂളിന്നവധിയാണത്രേ! സമരം, അടുത്തുള്ള
'ബാറു' തുറക്കുവാനത്രേ!
മൂടിപ്പുതച്ചു കിടന്നുറങ്ങാം, അൽപ്പനേരം,
വിശപ്പിൻ വിളികളെത്തും വരെ .

ഉമ്മറത്തിന്നും പതിഞ്ഞ ശബ്ദം, അച്ഛനെ-
ന്നത്തെയും പോലെണീറ്റതാകാം.
"വൈകുവാനാകില്ല പെണ്ണേ, വിതയ്ക്കണം
ചെല്ലട്ടെ ഞാനത്രടം വരേയ്ക്കും"
കോരന്നു കഞ്ഞിയുമായുച്ച നേരത്ത്
പോരണം എന്നു പറഞ്ഞു താതന്‍,
തോളില്‍ തുരുമ്പിച്ച തൂമ്പയുമേന്തി നെല്‍-
പ്പാടത്തിലേയ്ക്കു നടന്നു മെല്ലെ.   

തോടുമുറിച്ചൂ കടന്നൂ, വരമ്പിലൂ-
ടായം പിടിച്ചു  നടന്നൂ.
അല്‍പദൂരത്തിതാ കണ്ടൂ, വിളക്കിന്റെ
കൊച്ചുവെളിച്ചത്തിലായി,
കോരന്‍ വരമ്പിലിരുന്നു കൊണ്ടാരോടോ
തോരാതെയെന്തോ പറഞ്ഞു
പാടത്തു വിത്തു വിത കഴിഞ്ഞു, കോര-
നാര്‍ക്കോ കൊടുക്കുന്നു കൂലി.

വെള്ളിടി പോലെ മനസ്സില്‍ തെളിഞ്ഞു,
താന്‍ കണ്ടതു  സ്വപ്നമാണെന്നോ?
ഇന്നലെയല്ലോ പണം തന്നു, കോരനീ
പാടം വിലയ്ക്കു വാങ്ങിച്ചൂ.
പെട്ടെന്നെഴുന്നേറ്റു ചെന്നു, ഉമ്മറ-
ത്തമ്മയിരുന്നു കേഴുന്നു .
ഒന്നുമറിയാതെയച്ഛന്‍, നെഞ്ചിന്‍
നീറ്റലണയ്ക്കുന്നു തെക്കായ്.

ദീപക് ജി നായര്‍
 

മറവിയുമായി ഒരു ഒത്തുതീര്‍പ്പ്..
ഇതുവരെയുള്ള ഓര്‍മ്മകളെ തിരികെ തന്നാല്‍ ഇനിയുള്ളതെല്ലാം പകരം തരാം...
ഇന്നലെകളെയും നാളെകളെയും, ഓര്‍മ്മകളെയും മറവിയെയും ഇന്നുകൊണ്ടൊരു പകുത്തെടുക്കല്‍..

ദീപക് ജി നായര്‍

ഇനിയുമൊരിക്കലെന്നോതിപ്പിരിഞ്ഞന്നു

കിനിയാതെ കണ്ണീരൊളിപ്പിച്ച മിഴിയുമായ്

വനികയിൽ പൂത്തപൂമൊട്ടുകൾ പൂക്കളായ്

കനികളായ് കാലത്തിനലയില്‍ കൊഴിഞ്ഞുപോയ്.

പൊഴിയുന്നിതോര്‍മ്മകള്‍ തന്‍ മഴത്തുള്ളികള്‍
നനയുന്നു ഞാനതില്‍ തിരയുന്നിതാ മണം 

 ശുഭദിന ആശംസകള്‍...

 ദീപക് ജി നായര്‍

മണ്ണില്‍ ജനിച്ചനാള്‍തൊട്ടുനാമെല്ലാരും

ഉള്ളില്‍ ഭയക്കുന്നതൊന്നുമാത്രം.
കയ്യില്‍ ചുരുട്ടിയ പാശവും പേറി, യമ-
നെന്നാഗമിക്കുമെന്നുയിരെടുപ്പാന്‍.
ഉള്ളത്രകാലമിതുതന്നേ നിനച്ചു നാം
സര്‍വ്വത്ര പാഴാക്കിടുന്നതീ  ജീവിതം
ഇല്ലായ്മ ചെയ്ക ഭയമിന്നേ മനസ്സതില്‍
നിന്നും നിരാശകളറുത്തകറ്റീടുക.
ആശതൻ തേർ തെളിച്ചിന്നേ തുടങ്ങുക 

മോശമല്ലാതുള്ള കർമ്മങ്ങളൊക്കെയും 

 

ദീപക് ജി നായർ