മരമൊന്നു നട്ടു ഞാൻ മണ്ണിലല്ല, മനം
മരവിച്ചിടാ മുഖപ്പുസ്തകത്തിൽ
തടമൊന്നെടുത്തതിൻ ചോട്ടിലല്ല, ജനം
നിറയുന്ന കവലയിൽ കാഴ്ചയാക്കി
വളരുന്നതിലയല്ല,  കാണ്ഡമല്ല, വനം
കരിയുന്നൊരഗ്നി തൻ നാവതല്ലോ
പൂത്തതും കായ്ച്ചതും കനികളല്ല, ധനം
പൂത്തിരിക്കും പണപ്പെട്ടി മാത്രം
പെയ്യാതൊഴിഞ്ഞ പേമാരിയല്ല, കനൽ
പെയ്യുന്നൊരീക്കൊടും വേനൽ മാത്രം.
തണ്ണീരു വററിയതല്ല തെല്ലും, തണൽ
തല്ലിക്കെടുത്തി മഴ ചുട്ടു തിന്നോൻ,
മരമൊന്നു നട്ടു നനച്ചെടുക്കാം, മണ്ണിൽ
വരമൊന്നിതെന്നു കുറിച്ചു വയ്ക്കാം.

ദീപക് ജി നായർ

തണലുതേടുന്ന സഞ്ചാരിയല്ലവൾ
തണൽ വിരിക്കും തരുപ്പച്ചയോർക്കുക
വെറുതെയല്ല പറഞ്ഞതീ വാക്കുകൾ
വെയിലിൽ വേവിച്ചെടുത്തതാണിന്നലെ
വരിയിലർത്ഥം തിരഞ്ഞു തളരാതെ നീ
വഴിയിലോർമ്മകൾ ചേർത്തു നിർത്തീടുക
ഇരുളിലെന്നും നിലാവായ് നിനക്കുമേൽ
വഴിതെളിയ്ക്കുന്നൊരമ്പിളിച്ചേലവൾ!!

ദീപക് ജി നായർ

ചേർത്തു വയ്ക്കുന്നു ഞാൻ നിന്നെയെന്നോർമ്മ തൻ
നേർത്ത വെൺതാളിലൊരു കണ്ണുനീ൪ത്തുള്ളിയായ്
ഓർക്കുവാനാവാതിരിക്കില്ലൊരിയ്ക്കലും
പേർത്തുപേർത്തെന്നിൽ തിളയ്ക്കുന്ന നിൻമുഖം
കാത്തിരിയ്ക്കാനൊട്ടു കാത്തുനില്ക്കാതെയെൻ...
കൂട്ടുവിട്ടെങ്ങു പറന്നു നീ പൈങ്കിളീ
കാട്ടുതീയായ് വന്നെരിച്ചുപോയ് സർവ്വവും
പാട്ടും നിലച്ചാട്ടമൊക്കെയും തീർന്നുപോയ്
കാറ്റിൽപ്പൊതിഞ്ഞു നില്ക്കുന്നിതെൻ ചിന്തകൾ
ചാറ്റലായ് പെയ്യുന്നതോർമ്മ തൻ ചിന്തുകൾ

ദീപക് ജി നായർ 

സ്വപ്‌നത്തിന്‍ ഊടുവലിച്ചൊരു
കുപ്പായം തുന്നും മകളെ
വയറെരിയണ നേരത്തും ചിരി
തിരിയായി തെളിയുവതെങ്ങിനെ?

കര തേടിയലഞ്ഞൊരു തിരയുടെ
കരമേറിയലഞ്ഞു നടക്കെ
കരയാതിരുകണ്ണുകളില്‍ക്കനവൊ-
ളിമിന്നുവതെങ്ങിനെ മകളെ ?

മലയായൊരു മനമതില്‍നിന്നൊരു
പുഴമകളായ് ഒഴുകിയിറങ്ങി
പ്രണയക്കുളിരുദരമതില്‍ച്ചെറു -
ചലനത്തിന്നുത്സവമേളം.


വഴിപാതിയിലിരുമെയ്യായ്, നിറ
വയറൊഴിയും നേരത്തും നീ
ചെളിപാകിയ മണ്ണിനു മേലൊരു
തെളിനീരായ്‌ ഒഴുകുവതെങ്ങിനെ ?


ഒടുവില്‍ കടലമ്മത്തൊട്ടിലി-
നാഴങ്ങളിലന്തിയുറങ്ങി
കരതോറും തിരയായ്‌ നിന്നുടെ
മകളെയും തേടി നടപ്പൂ !!

ദീപക് ജി നായര്‍

ഓർമ്മയിൽ ഓ എൻ വി

ഓർമ്മയിൽ ഓ എൻ വി 

ഉപ്പ്

ഉപ്പ്

വെളുത്ത പിഞ്ഞാണത്തിൽ ഒളിച്ചിരുന്ന വറ്റുകളെ
 മുങ്ങാംകുഴിയിട്ട് കണ്ടെടുത്ത പ്ലാവിലക്കുമ്പിളിലേയ്ക്ക്
ഇറ്റുവീണ രുചിക്കൂട്ട്
ഇരുൾ തന്ന സ്വാതന്ത്ര്യത്തിൽ, തലയിണകളോട് പറഞ്ഞ കഥകൾക്ക് മേൽ
പടർന്നുറഞ്ഞു പോയ സ്വപ്നങ്ങളുടെ ശേഷിപ്പ്
ചാരുകസേരശ്ശീലയിൽ വിയർത്ത നെടുവീർപ്പുകൾക്കൊപ്പം പതിഞ്ഞു പോയ പഴയ പ്രതാപത്തിന്റെ എണ്ണക്കറുപ്പ്
കണ്ണിമാങ്ങാഭരണിയിൽ മുത്തശ്ശി ചേർത്ത ചേരുവകളിൽ കാലത്തെ അതിജീവിച്ച് ഓർമ്മകളിലേയ്ക്ക് നീണ്ടു നില്ക്കുന്ന നാട്ടുരുചി
കൂട്ടുകാരിൽ  നിസ്സാരനെന്ന അപകർഷതാബോധത്തെ കാറ്റിൽ പറത്തി
ഒരു നുള്ളു കൊണ്ട് ലോകം കീഴടക്കിയവൻ
ഇത്തിരികൊണ്ട് ഒത്തിരി നല്കിയ കുഞ്ഞുണ്ണിക്കവിതകളെപ്പോലെ
എളിമയിലും പെരുമ ചോരാതെ നാവിലൂറുന്ന രസം
കല്ലാണെങ്കിലും കരളുറപ്പില്ലാതെ സ്വയം അലിഞ്ഞു തീരുന്നവർ!!

ദീപക് ജി നായർ

ആ൪പ്പുവിളികളല്ല,
അടക്ക൦ പറച്ചിലുകളായിരുന്നു എനിയ്ക്കെന്നു൦ ഊ൪ജ്ജ൦ പക൪ന്നത്..

ദീപക് ജി നായ൪