ഗുരുസ്മരണ

ഗുരുസ്മരണ 

തറയില്‍ നിരത്തിയമണലിലെന്‍ ചൂണ്ടാണി
വിരല്‍പിടിച്ചാദ്യമായെഴുതാന്‍പഠിപ്പിച്ച
ഗുരുരൂപവിഗ്രഹമകതാരിലായിരം
നിറദീപനാളത്തിനൊളിതൂകിയെന്നുമേ
അണയാതെ കാക്കുവാനരുളേണമേ കൃപ-
യവസാനകാലം വരേയ്ക്കും മനസ്സിതില്‍..

ദീപക് ജി നായര്‍

നോവ്‌

നോവ്‌ 

നോവുപെറ്റുവളര്‍ത്തിയകുഞ്ഞെനി-
ക്കാരുനല്കുവാനാണിനി നൊമ്പരം
ചാവുകടലുപ്പുറഞ്ഞൊരീക്കവിളിലി-
ന്നാവുകില്ല നിന്‍ ചുംബനച്ചോപ്പിന്റെ,
ചൂരുവേറിട്ടെടുക്കുവാന്‍ കാമിനീ..
നേരുചൊല്ലുകില്‍ നീറുമെന്‍ ഹൃത്തതില്‍
വേരുറച്ച നിന്‍ രൂപഭാവങ്ങളെ,
കാലചക്രക്കരങ്ങളാല്‍ വേരറുത്തഴലു
മറവിയില്‍ മറവുചെയ്യട്ടെ ഞാന്‍..!!

 ദീപക് ജി നായര്‍

മൃത്യു

മൃത്യു 

മൃത്യുവെന്നൊന്നിനെ കാത്തുകാത്തീജന്മ-
മത്രയും കര്‍മ്മങ്ങളൊന്നുമേ ചെയ്യാതെ
എത്തിടും ജീവപ്പകര്‍ച്ചതന്‍ ദുര്‍ദ്ദിന-
മൊട്ടുമേ കാക്കാതെ കൊത്തിപ്പറന്നുപോം
ചട്ടങ്ങളൊന്നുമേ തെറ്റാതൊരിക്കല്‍ നാം
ചട്ടക്കൂടായിപ്പതിച്ചിടും മണ്ണിതില്‍
അല്പകാലം കൊണ്ടനവധി നന്മതന്‍
ശില്പിയായ്ത്തീരാനനുഗ്രഹാശംസകള്‍!!

 ദീപക് ജി നായര്‍

അനാഥര്‍

അനാഥര്‍ 

പെയ്തൊഴിഞ്ഞ വാനിലെവിടെയോ
പെയ്തിറങ്ങാന്‍ കൊതിച്ച് ഒരു
അനാഥമേഘക്കീറ്...

ചുറ്റും പെയ്ത മഴത്തുള്ളികളിലൊന്നിനെ
കൊതിച്ചൊരു തുണ്ട് മണ്ണ്....

 ദീപക് ജി നായര്‍.

എന്റെ ചിക്കു

എന്റെ ചിക്കു

ഇപ്പൊഴും കിലുങ്ങുന്നുണ്ടോമനേ നിന്‍കാല്‍വള
മുത്തതെന്‍മനസ്സില്‍ നീയിട്ടേച്ചു പോയെങ്കിലും
മൊട്ടുകള്‍ വിടരാത്ത മോണകള്‍ കാട്ടിച്ചിരിച്ചി-
പ്പൊഴുംകുഞ്ഞേ നീയെന്‍ ഹൃത്തതില്‍കളിക്കുന്നു
ഒട്ടുനാളായില്ലഗ്നിസൂര്യനായുദിച്ചിട്ടിന്നസ്ത-
മിച്ചേതോകടല്‍ത്തിരയായ്അലിഞ്ഞേപോയ്
കണ്ണുകള്‍ തുറന്നേ കാത്തിരിപ്പൂ വിണ്ണില്‍
മിന്നും പൊന്നൊളിത്താരം പോലെന്‍
മുന്നില്‍ നീ തെളിഞ്ഞെങ്കില്‍...

ദീപക് ജി നായര്‍

ഓര്‍മ്മയിലെ ഓണം

ഓര്‍മ്മയിലെ ഓണം 


ഓണമിങ്ങെത്തി തിരുവോണമെഫ്ബിയില്‍
പോസ്റ്റുകള്‍ പൂക്കള സമങ്ങളായ് നിറയുന്നു.
പൂക്കുടയേന്തിയെന്‍ കൂട്ടുകാരൊത്തു ചേര്‍ന്നാ-
ര്‍പ്പു വിളിച്ചു നടന്നതു പോലവേ
ലൈക്കും കമന്റും നിറയ്ക്കുവാന്‍ കുട്ടികള്‍...
കൂട്ടമായ്‌ സ്മാര്‍ട്ട്‌ ഫോണുമേന്തിയിരിക്കുന്നു
ഓണം കലണ്ടറില്‍ ചോപ്പായ് ചിരിക്കുന്നോ-
രക്കങ്ങളില്‍ ഒന്നു മാത്രമായ് മാറിയോ?
വേണം നമുക്കു പൊന്നോണംമനസ്സിലെ
ക്കോണില്‍മണക്കുന്നൊരോര്‍മ്മയായെങ്കിലും ..

ദീപക് ജി നായര്‍

ഉണ്ണിക്കുട്ടന്റെ ഓണം

ഉണ്ണിക്കുട്ടന്റെ ഓണം 




മുറ്റം മെഴുകണ്ടേ ഉണ്ണിക്കുട്ടാ
പച്ചപ്പുല്ലില്ലെന്റെ കുഞ്ഞേട്ടായി
കാടികൊടുത്തൊന്നുനോക്കുകുട്ടാ
കാലി തൊഴുത്തിലിന്നില്ലയേട്ടാ
തുമ്പപ്പൂ കൊണ്ടുവാ ഉണ്ണിക്കുട്ടാ ...
തുമ്പ ചിരിച്ചതില്ലെന്റെയേട്ടാ
മണ്ണുകുഴച്ചു മാവേലി തീര്‍ക്കാം
മണ്ടത്തരം വിളമ്പാതെയേട്ടാ
മണ്ണ് നാം വിറ്റതറിഞ്ഞതല്ലേ
മുന്നിലീ കോണ്‍ക്രീറ്റടുക്കു മാത്രം
എന്തിനിച്ചെയുമെന്നുണ്ണിക്കുട്ടാ
ചന്തയില്‍ പോയ് വരാമിന്നു തന്നെ
തേങ്ങിയിരിക്കുവാന്‍ നേരമില്ലാ
വാങ്ങിടാമോണം വിലക്കിഴിവില്‍  

ദീപക് ജി നായര്‍